دبئی ڈیٹا اینڈ اسٹیٹسٹکس اسٹیبلشمنٹ نے دبئی کی آبادی سے متعلق تازہ اعداد و شمار جاری کیے ہیں۔ ادارہ شماریات کے مطابق گزشتہ 50 برسوں میں دبئی کی آبادی ایک لاکھ 87 ہزار سے بڑھ کر 40 لاکھ تک پہنچ گئی ہے۔ سن 1975 میں دبئی کی آبادی صرف ایک لاکھ 87 ہزار تھی، جو 2011 میں 20 لاکھ تک جا پہنچی، جبکہ 2025 میں یہ تعداد 40 لاکھ ہوگئی۔ ماہرین کا کہنا ہے کہ اگر یہی رفتار برقرار رہی تو 2032 میں دبئی کی آبادی 50 لاکھ اور 2039 تک 60 لاکھ تک پہنچ سکتی ہے۔ معاشی ماہرین کے مطابق دبئی سرمایہ کاروں، پروفیشنلز، ملینرز اور بلینرز کے لیے ایک پرکشش مقام ہے، اور آبادی میں اضافے کے باعث رہائش، تعلیم، صحت اور پبلک ٹرانسپورٹ کی طلب بھی بڑھتی جائے گی۔