وزیراعظم شہباز شریف سعودی عرب کے سرکاری دورے پر روانہ ہوگئے ہیں، جہاں وہ سعودی ولی عہد محمد بن سلمان سے اہم ملاقات کریں گے۔ ترجمان دفتر خارجہ کی جانب سے کہا گیا کہ وزیراعظم کو یہ دعوت سعودی ولی عہد نے دی ہے، ملاقات میں پاکستان اور سعودی عرب کے تعلقات کے تمام پہلوؤں کا جائزہ لیا جائے گا جبکہ دو طرفہ تعاون کے نئے مواقع پر بھی غور کیا جائے گا اور دونوں رہنماؤں کے درمیان علاقائی اور عالمی امور پر بھی تبادلہ خیال ہوگا۔ میڈیا رپورٹ کے مطابق سعودی عرب کے دورے کے بعد وہ برطانیہ روانہ ہوں گے جہاں وہ دو روز قیام کریں گے اور برطانوی حکام سے ملاقاتیں کریں گے۔ پھر وزیراعظم 21 ستمبر کو برطانیہ سے امریکہ روانہ ہوں گے۔ وہ نیویارک میں اقوام متحدہ کی جنرل اسمبلی کے اجلاس میں شرکت کریں گے اور 26 ستمبر کو جنرل اسمبلی سے خطاب کریں گے۔