اس وقت دنیا کی نظریں ایمازون کے بانی 61 سالہ جیف بیزوس اور ان کی منگیتر 55 سالہ لورین سانچیز کی شادی پر مرکوز ہیں، جسے "صدی کی شادی” قرار دیا جا رہا ہے۔

جوڑا پہلے سے شادی شدہ تھا اور دونوں کے بچے بھی ہیں۔ 2019 میں دونوں نے اپنی شادیاں ختم کیں اور ایک دوسرے کے ساتھ منگنی کا اعلان کیا تھا۔

جیف بیزوس اور لورین سانچیز کی شادی اٹلی کے تاریخی شہر وینس میں 3 دن تک جاری رہے گی، جس میں دنیا بھر سے مشہور شخصیات شرکت کے لیے آ رہے ہیں۔

جیف بیزوس کا نام کسی کا تعارف کا محتاج نہیں وہ ای کامرس اور خلائی مہمات کے کامیاب ترین بزنس مین ہیں جن کا شمار دنیا کے امیرترین شخصیات میں ہوتا ہے۔

تاہم لورین سانچیز بھی ایک غیر معمولی اور باہمت شخصیت ہیں جنہوں نے صحافت، ہوابازی، اور خلائی سفر جیسے میدانوں میں نمایاں کامیابیاں حاصل کی ہیں۔

پس منظر اور ابتدائی زندگی

لورین سانچیز 1969 میں امریکی ریاست نیو میکسیکو میں پیدا ہوئیں اور کیلیفورنیا میں پلی بڑھیں۔ ایک انٹرویو میں انہوں نے انکشاف کیا تھا کہ ہم کچھ بھی نہیں تھے، میں اپنی نانی کی کار کے پچھلے حصے میں سوتی تھی جب وہ لوگوں کے گھروں کی صفائی کرتی تھیں۔

لورین ایئر ہوسٹس بننا چاہتی تھیں لیکن اس وقت کی جسمانی معیار کی پابندیوں کی وجہ سے انھیں ملازمت دینے سے انکار کردیا گیا تھا۔

اس کے بعد انہوں نے جنوبی کیلیفورنیا یونیورسٹی سے صحافت کی تعلیم حاصل کی اور 1990 کی دہائی میں براڈکاسٹ جرنلزم میں قدم رکھا۔

ٹی وی اسٹار سے ایوی ایشن پائلٹ تک

لورین سانچیز نے Fox Sports, Good Day LA, اور Extra جیسے پروگرامز میں رپورٹنگ اور میزبانی کی اور ایمی ایوارڈ بھی حاصل کیا۔ وہ مشہور شو "So You Think You Can Dance” کی پہلی میزبان بھی رہ چکی ہیں۔

لورین نے 40 سال کی عمر میں ہیلی کاپٹر پائلٹ کا لائسنس حاصل کرکے سب کو حیران کردیا اور 2016 میں Black Ops Aviation کے نام سے امریکا کی پہلی خاتون ملکیت ایریل فلم کمپنی قائم کی۔

2025 کے اوائل میں، وہ بلو اوریجن کے ایک مشن میں شامل ہوئیں اور 10 منٹ کے سب آربیٹل خلائی سفر کے دوران خلا میں گئیں، جہاں انہوں نے "اوور ویو ایفیکٹ” کا تجربہ کیا اور زمین کو بچانے کا پیغام دیا۔

2024 میں انہوں نے بچوں کے لیے ایک کتاب "The Fly Who Flew to Space” بھی لکھی، جو ان کے بچپن میں ڈسلیکسیا (الفاظ کی پہچان میں مشکل) کے ساتھ جدوجہد پر مبنی ہے۔

ذاتی زندگی اور بیزوس سے تعلق

لورین سانچیز کی پہلی اولاد 2001 میں NFL کھلاڑی ٹونی گونزالیز سے ہے۔ 2005 میں لورین نے ہالی وُڈ ایجنٹ پیٹرک وائٹ سیل سے شادی کی جن سے ایک بیٹا اور بیٹی بھی ہے۔

لورین کی جیف بیزوس سے ملاقات 2018 میں ہوئی تھی جب ان کی کمپنی Black Ops Aviation نے بیزوس کی خلائی کمپنی Blue Origin کے لیے فلم سازی کی خدمات فراہم کیں۔

دونوں کے درمیان گہری دوستی ہوگئی جو 2019 میں جیف بیزوس کی ان کی اہلیہ میکینزی اسکاٹ سے علیحدگی کی وجہ بنی اور اسی سال لورین نے بھی اپنے شوہر سے طلاق لے لی تھی۔

اپنی اپنی سابق شادیاں ختم کرکے جیف بیزوس اور لویرن نے 2023 میں باقاعدہ منگنی کا اعلان کیا اور اٹلی کے ساحل پر اپنی یاٹ پر منگنی کی شاندار تقریب منعقد کی تھی۔

وینس میں شاندار شادی

تاہم اب یہ جوڑا اٹلی کے تاریخی شہر وینس میں اپنی تین روزہ شادی کی تقریبات میں مشغول ہے جس پر لاکھوں ڈالر خرچ کیے جا رہے ہیں اور دنیا بھر سے مشہور شخصیات شریک ہیں۔