ایم کیو ایم پاکستان کے رہنما اور اپوزیشن لیڈر علی خورشیدی نے کہا ہے کہ مرتضیٰ وہاب خود کو 106 سڑکوں کا میئر قرار دیتے ہیں، لیکن حقیقت یہ ہے کہ کراچی کی تمام شاہراہیں خستہ حالی کا شکار ہیں اور حالیہ بارشوں نے شہر کے انفرااسٹرکچر کو مزید تباہ کر دیا ہے۔

کراچی میں میڈیا سے گفتگو کرتے ہوئے انہوں نے کہا کہ بلدیاتی نمائندوں کو شہر کی ابتر حالت سے کوئی دلچسپی نہیں، کراچی میں ایک ناکارہ اور لولا لنگڑا بلدیاتی نظام نافذ ہے جو شہر کے مسائل حل کرنے کی صلاحیت ہی نہیں رکھتا۔ ان کا کہنا تھا کہ اس نظام کو نافذ کرنے میں پیپلز پارٹی، جماعت اسلامی اور پی ٹی آئی سب شریک ہیں۔

علی خورشیدی نے مزید کہا کہ کے ایم سی اور ڈی ایم سی کی کارکردگی اطمینان بخش نہیں، عوام کو بنیادی سہولیات فراہم کرنا حکومت کی ذمہ داری ہے، اور مالیاتی خودمختاری کے بغیر کراچی کے انتظامات بہتر نہیں ہو سکتے۔