سندھ حکومت نے موسمیاتی تبدیلی کے اثرات سے نمٹنے اور فی ایکڑ پیداوار میں اضافہ یقینی بنانے کے لیے کسانوں کی تربیتی مہم کا آغاز کردیا ہے۔ صوبائی وزیر زراعت سردار محمد بخش مہر کے مطابق اس منصوبے میں کسانوں کو جدید طریقۂ کاشت، فصل کی بہتر پیداوار، پودوں کی نشوونما، کم پانی میں کاشت اور کیڑوں کے تدارک کے حوالے سے عملی تربیت دی جارہی ہے۔ اس اقدام سے نہ صرف کسانوں کی آمدنی میں اضافہ ہوگا بلکہ صوبے میں غذائی تحفظ بھی مضبوط ہوگا۔

وزیر زراعت نے بتایا کہ کلائمٹ سمارٹ ایگریکلچر منصوبہ سندھ واٹر اینڈ ایگریکلچر ٹرانسفارمیشن پروگرام کے تحت شروع کیا گیا ہے، جو 5 سال تک جاری رہے گا اور 2028 میں مکمل ہوگا۔ منصوبے کے تحت 180 فیلڈ اسکول قائم کیے جائیں گے، جہاں 4 ہزار 500 کسانوں کو تربیت دی جائے گی۔ ان کا کہنا تھا کہ موسمیاتی تبدیلی زرعی شعبے کے لیے ایک بڑا چیلنج بن چکی ہے، جس سے فصلیں متاثر ہورہی ہیں اور کسان معاشی نقصان اٹھا رہے ہیں۔