نیو یارک میں وزیرِاعظم شہباز شریف اور ورلڈ بینک کے صدر اجے بنگا کے درمیان اہم ملاقات ہوئی۔ اس موقع پر نائب وزیرِاعظم اسحاق ڈار، وزیرِخزانہ محمد اورنگزیب اور وزیرِاطلاعات عطا تارڑ بھی شریک تھے۔
ورلڈ بینک کے صدر نے پاکستان کی جانب سے جاری اصلاحاتی اقدامات کو سراہا۔ وزیرِاعظم نے اجے بنگا کو حکومت کے جامع اصلاحاتی ایجنڈے سے آگاہ کرتے ہوئے کہا کہ پاکستان مشکل حالات، بالخصوص کورونا وبا اور 2022 کے تباہ کن سیلاب کے دوران ورلڈ بینک کی مسلسل مدد کو قدر کی نگاہ سے دیکھتا ہے۔
وزیرِاعظم نے اجے بنگا کی قیادت کو خراجِ تحسین پیش کرتے ہوئے کہا کہ اُن کے اقدامات نے ورلڈ بینک کو زیادہ مؤثر اور تیز تر ترقیاتی شراکت دار بنانے کے ساتھ ساتھ نجی شعبے کے وسائل کو متحرک کرنے اور آپریشنز کو سہل بنانے میں اہم کردار ادا کیا ہے۔
