وفاقی وزیر منصوبہ بندی احسن اقبال نے کہا ہے کہ دنیا نے دیکھ لیا ہے کہ بھارت کس قدر بزدل ملک ہے، جو پانی کو ہتھیار بنا کر اپنی بہادری ظاہر کرنا چاہتا ہے۔ نارووال میں سیلاب سے متاثرہ گاؤں کے دورے کے موقع پر میڈیا سے گفتگو کرتے ہوئے انہوں نے کہا کہ 1988 کے بعد ملک کو سب سے بڑے سیلاب کا سامنا کرنا پڑا ہے۔ پاکستان اور بھارت کے درمیان پانی کا ایک معاہدہ موجود تھا مگر بھارت نے اس کی خلاف ورزی کی۔
انہوں نے کہا کہ بھارت پانی کو ہتھیار بنا کر پاکستانی قوم کے حوصلے کو پست نہیں کر سکتا۔ احسن اقبال کا کہنا تھا کہ وفاقی اور صوبائی حکومتیں سیلاب متاثرین کے ساتھ ہیں، نقصانات کا جائزہ لینے کے لیے سروے ٹیمیں کام کر رہی ہیں اور رپورٹ مرتب کریں گی۔ انہوں نے مزید کہا کہ عوام کے منتخب نمائندے مشکل وقت میں اپنی قوم کے ساتھ ہیں جبکہ پاک فوج، ریسکیو، پولیس اور دیگر اداروں نے مل کر سیلاب متاثرین کی مدد کی ہے۔
