پاکستان اور انڈونیشیا کے درمیان صحت کے شعبے میں باہمی تعاون کے نئے دور کا آغاز ہوگیا ہے، جہاں دونوں ممالک نے صحت عامہ، ادویات سازی، اور ویکسین کی مقامی پیداوار جیسے اہم موضوعات پر ایک دوسرے سے مل کر کام کرنے کا عزم ظاہر کیا ہے۔

ترجمان وزارتِ صحت کے مطابق، پاکستان میں تعینات انڈونیشیا کے سفیر نے وزیرِ مملکت برائے صحت ڈاکٹر مختار بھرتھ سے اسلام آباد میں ملاقات کی۔ ملاقات کے دوران صحت کے شعبے میں دو طرفہ تعاون، انسانی وسائل کے تبادلے، اور طبی اداروں کے قیام جیسے موضوعات پر مفصل گفتگو ہوئی۔

ڈاکٹر مختار بھرتھ نے ملاقات کو ’’باہمی اہداف کو ٹھوس صحت اقدامات میں تبدیل کرنے کی جانب ایک اہم قدم‘‘ قرار دیا۔ ان کا کہنا تھا کہ پاکستان، انڈونیشیا کے ساتھ اس کے تعاون کو ایک اسٹریٹجک ترجیح کے طور پر دیکھتا ہے اور دونوں ممالک کے مابین صحت سے متعلق دیرپا منصوبوں پر کام کےلیے تیار ہے۔

اس ملاقات میں ویکسین کی پیداوار کو مشترکہ دلچسپی کا ایک کلیدی شعبہ قرار دیا گیا، اور ڈاکٹر مختار بھرتھ نے زور دیا کہ پاکستان میں انڈونیشیا کے تعاون سے ویکسین کی تیاری کو فروغ دینا وقت کی اہم ضرورت ہے۔

انڈونیشیا کے سفیر نے اس بات پر زور دیا کہ دونوں ممالک کو صحت کے شعبے میں دو طرفہ تعاون بڑھانے کے مزید مواقع تلاش کرنے چاہئیں، اور انڈونیشیا اس شراکت کو آگے بڑھانے کے لیے پُرعزم ہے۔

ڈاکٹر مختار بھرتھ کا کہنا تھا کہ پاکستان، انڈونیشیا سے صحت کے شعبے میں ایک دوسرے کے تجربات سے بھرپور استفادہ کرنا چاہتا ہے، تاکہ مشترکہ اہداف کو دونوں ممالک کے لیے مؤثر صحت اقدامات میں بدلا جا سکے۔