پاکستان نیوی نے چین کے تعاون سے سمندر کی تہہ میں گیس کے بڑے ذخائر دریافت کر لیے ہیں۔ اس پیش رفت کا انکشاف ریئر ایڈمرل (ر) فواد امین بیگ نے ایک نجی ٹی وی انٹرویو میں کیا۔ ان کا کہنا تھا کہ پاک بحریہ نے چین کے اشتراک سے جدید سروے کیا، جس کے نتائج نہایت حوصلہ افزا نکلے۔ یہ دریافت صرف نیوی کی کامیابی نہیں بلکہ پاکستان کی معاشی خودکفالت کی جانب ایک اہم قدم ہے۔ اگر ان وسائل کو درست حکمتِ عملی کے ساتھ بروئے کار لایا گیا تو نہ صرف توانائی کے بحران پر قابو پایا جا سکتا ہے بلکہ معیشت کو بھی نئی بلندیوں تک پہنچایا جا سکتا ہے۔ انہوں نے زور دیا کہ اب محض دریافت پر خوش ہونے کے بجائے سیاسی، انتظامی اور تکنیکی سطح پر فوری اور مؤثر فیصلے کرنا ضروری ہیں تاکہ یہ ذخائر حقیقی ترقی کا ذریعہ بن سکیں۔