پاکستان پیپلز پارٹی کی رہنما شرمیلا فاروقی نے کہا ہے کہ یہ ممکن نہیں کہ مریم نواز دھمکیاں دیں اور ہم خاموشی سے حکومتی بینچوں پر بیٹھے رہیں، جب تک معاملات درست نہیں ہوتے ہم حکومتی بینچوں پر نہیں بیٹھیں گے۔
نجی ٹی وی سے گفتگو میں ان کا کہنا تھا کہ بیان بازی کا سلسلہ کافی دنوں سے جاری ہے اور اب شدت اختیار کر گیا ہے۔ مریم نواز نے غیر مناسب گفتگو کی، جبکہ حکومتیں اس انداز سے نہیں چل سکتیں کہ بات ہو "میرا پیسہ” اور "میرا پانی”۔
انہوں نے کہا کہ جب ہم بینظیر انکم سپورٹ پروگرام (بی آئی ایس پی) کی بات کرتے ہیں تو جواب میں تنقید کی جاتی ہے۔ ہمارے رہنما پنجاب کے حالات بیان کر رہے ہیں، سیاست نہیں کر رہے۔ لوگ کھلے آسمان تلے بیٹھے ہیں تو سوال یہ ہے کہ آپ ان کی مدد کس طرح کر رہے ہیں؟
شرمیلا فاروقی کا مزید کہنا تھا کہ اگر آپ 10 لاکھ دینا چاہتی ہیں تو بی آئی ایس پی کے ذریعے ہی دے دیں۔ پروگرام کا نام بینظیر انکم سپورٹ پروگرام ہے تو پھر اسے استعمال کرنے سے گریز کیوں؟
