سپریم کورٹ رجسٹری کراچی میں پی آئی اے میں جعلی ڈگری پر برطرفی کے خلاف حکم امتناع کے معاملے پر وفاقی حکومت کی اپیل کی سماعت چیف جسٹس یحییٰ آفریدی کی سربراہی میں تین رکنی بینچ نے کی۔ عدالت نے سندھ ہائیکورٹ کا دیا گیا حکم امتناع ختم کر دیا۔
سماعت کے دوران ایڈیشنل اٹارنی جنرل محسن شاہوانی نے مؤقف اختیار کیا کہ ندیم لودھی جعلی ڈگری کی بنیاد پر ایسوسی ایٹ انجینئر بھرتی ہوئے تھے اور حکم امتناع کے دوران ترقی پا کر آفیسر گریڈ کے گروپ 6 تک پہنچ گئے۔
اس موقع پر جسٹس یحییٰ آفریدی نے ریمارکس دیے کہ ندیم لودھی گزشتہ 10 سال سے اسٹے آرڈر پر کام کر رہے ہیں، جو ناقابل قبول ہے۔ عدالت نے کہا کہ ہم حکم امتناع واپس لے رہے ہیں، آپ اپنے کیس کی تیاری کریں۔
