اب خلیجی تعاون کونسل (جی سی سی) کے ممالک کے شہری سال کے کسی بھی وقت عمرہ ادا کرسکتے ہیں۔

میڈیا رپورٹس کے مطابق جی سی سی ممالک کے شہری سال کے کسی بھی وقت عمرہ ادائیگی کیلئے سعودی عرب میں ہوا، زمینی یا سمندری، کسی بھی راستے بغیر ویزا یا فوری اجازت کے داخل ہوسکتے ہیں۔

سعودی وزارت حج و عمرہ نے اعلان کیا ہے کہ جی سی سی ممالک کے شہری 365 دن، 24 گھنٹے میں کوئی بھی وقت منتخب کرکے عمرہ کر سکتے ہیں ۔

خلیجی تعاون کونسل جس میں بحرین، کویت، عمان، قطر، سعودی عرب اور متحدہ عرب امارات شامل ہیں، کے شہریوں کیلئے سعودی عرب میں بغیر ویزا داخل ہوتے وقت صرف ان کا قومی شناختی کارڈ یا پاسپورٹ کا استعمال کیا جائے گا۔

عمرہ کے لیے مخصوص اجازت "نُسک” موبائل ایپ کے ذریعے فوری طور پر جاری ہوتی ہے۔ اگر جی سی سی شہری مسافر ہوں، تو وہ "ٹرانزٹ ویزا” یا "ٹورسٹ ویزا” کے ذریعے بھی سعودی عرب میں داخل ہو سکتے ہیں، بعض ایئر لائنز کے ذریعے بکنگ کرتے وقت یہ ویزا خودبخود فراہم کیا جاتا ہے۔

مزید آسانی کے لیے "ٹورسٹ-عمرہ” ویزا بھی دستیاب ہے جو آن لائن ksavisa.sa پورٹل سے حاصل کیا جا سکتا ہے۔

واضح رہے کہ یہ سہولت تقریباً پچھلے 6 ماہ سے دستیاب ہے۔ اگرچہ عام طور پر حج کے دوران (ذو الحجہ کے ابتدائی دنوں میں) عمرہ ویزے محدود ہوتے ہیں، جون 2025 کے وسط میں حج ختم ہونے کے بعد دوبارہ جاری کیے گئے ہیں۔