فیلڈ مارشل سید عاصم منیر نے کہا ہے کہ ریاست ہر سال قیمتی جانوں اور املاک کے نقصانات برداشت نہیں کر سکتی۔
آئی ایس پی آر کے مطابق آرمی چیف نے قصور سیکٹر اور جلالپور پیر والا (ملتان) میں قائم فلڈ ریلیف کیمپوں کا دورہ کیا اور متاثرہ علاقوں کا فضائی جائزہ بھی لیا۔ اس موقع پر انہیں زمینی صورتحال، جاری ریسکیو اور امدادی سرگرمیوں کے بارے میں بریفنگ دی گئی۔
فیلڈ مارشل عاصم منیر نے کہا کہ عوام کو بار بار آنے والے سیلاب کی تباہ کاریوں سے بچانے کے لیے تمام ضروری اقدامات اور انفرااسٹرکچر کی ترقی کو تیز کیا جانا چاہیے۔
انہوں نے ریلیف آپریشنز میں مصروف فوجی جوانوں، ریسکیو 1122 کے اہلکاروں اور پولیس افسروں سے ملاقات کی اور ان کے حوصلے، تیاری اور مشکل حالات میں قوم کی خدمت کے جذبے کو سراہا۔
فیلڈ مارشل نے محفوظ مقامات پر منتقل کیے گئے سیلاب متاثرین سے بھی ملاقات کی اور انہیں دوبارہ آبادکاری اور بحالی کے لیے مکمل تعاون کی یقین دہانی کرائی۔
