ٹی وی اور فلم انڈسٹری کی معروف اداکارہ ثروت گیلانی نے حال ہی میں ایک انٹرویو میں فلم جوانی پھر نہیں آنی کی ٹیم، ہمایوں سعید اور ان کی پروڈکشن ٹیم کے غیرپیشہ ورانہ طرزِ عمل پر کھل کر بات کرتے ہوئے ان پر تنقید کی ہے۔
فلم جوانی پھر نہیں آنی اور اس کے سیکوئل میں اداکاری کرنے والی ثروت گیلانی نے کہا کہ وہ اس فرنچائز کی تیسری فلم میں کام کرنے سے انکار کر چکی ہیں۔ ان کے مطابق اگرچہ وہ ندیم بیگ، ہمایوں سعید اور احمد علی بٹ کو پسند کرتی ہیں، تاہم وہ دوبارہ ’گُل‘ کا کردار ادا نہیں کرنا چاہتیں۔
اداکارہ نے انکشاف کیا کہ جوانی پھر نہیں آنی 2 کی پروموشن کے دوران ٹیم نے ان کے ساتھ غیر پیشہ ورانہ رویہ اختیار کیا۔ ثروت نے بتایا کہ انہوں نے خود لندن جانے کے لیے اپنی بکنگ کرائی تھی، مگر ٹیم کی جانب سے کوئی جواب یا تصدیق نہیں کی گئی، جس سے انہیں محسوس ہوا کہ ان کے ساتھ ناانصافی ہوئی ہے اور انہیں کام نکلنے کے بعد استعمال کر کے ایک طرف کردیا گیا ہے۔
ثروت گیلانی نے مزید بتایا کہ ان کی اداکاری کے مناظر دونوں فلموں کے دوران کاٹے گئے، جو ان کے مطابق ایک فنکار کے ساتھ نامناسب سلوک ہے۔ انہوں نے واضح کیا کہ وہ آئندہ اپنی عزتِ نفس اور وقار پر کوئی سمجھوتہ نہیں کریں گی۔
