پاکستان میں بصارت کی بحالی کا تاریخی سنگِ میل رکھ دیا گیا ہے جس میں پہلی مرتبہ مقامی خاتون کے عطیہ کردہ قارنیہ کی کامیاب پیوند کاری کی گئی ہے۔
تفصیلات کے مطابق پاک فوج کے ماہر سرجنز نے پاکستان میں پہلی بار مقامی خاتون کے عطیہ کردہ قارنیہ کی کامیاب پیوند کاری کر کے تاریخ رقم کر دی ہے۔
آرمڈ فورسز انسٹی ٹیوٹ آف اوفتھامولوجی (اے ایف آئی او) نے فوجی آپریشن میں بینائی سے محروم ہونے والے دو سپاہیوں کی بصارت بحال کر کے ایک اور تاریخی سنگ میل طے کرلیا ہے۔
میجر جنرل (ر) سید ظفر مہدی عسکری کی مرحوم اہلیہ کی وصیت پر کورنیہ اے ایف آئی او کو عطیہ کیا گیا۔ 30 سالہ سپاہی علی اللہ اور 26 سالہ سپاہی فلک شیر کی آنکھوں میں قارنیہ کی کامیاب پیوند کاری کی گئی
دونوں سپاہی اپنے فرائض کی انجام دہی کے دوران دہشتگردوں کے خلاف آپریشن میں اپنی بصارت سے محروم ہوئے تھے۔
اس تاریخی موقع پر مرحومہ کی بیٹی زہر ا مہدی نے والدہ کی قربانی پر فخر کا اظہار کیا اور کہا کہ اے ایف آئی او کے ماہرسرجنز کا پیشہ ورانہ کردار قابل تحسین ہے۔ سب سے بڑا اعزاز یہ ہے کہ والدہ کی آنکھیں دو بہادر فوجیوں کو عطیہ کی گئیں۔
زہرامہدی نے کہا کہ والدہ کے عطیہ کردہ قارنیہ سے سپاہیوں کی زندگی میں روشنی لوٹ آئی جو کہ صدقۂ جاریہ ہے۔ اے ایف آئی او کی جدید سرجری سے بصارت کی بحالی کا تاریخی کارنامہ قابلِ تحسین ہے۔
