کراچی (ویب ڈیسک) کراچی کے علاقے گلستان جوہر بلاک 19 میں تاجدار اللہ کی پراسرار موت کے کیس میں پولیس نے قانون نافذ کرنے والے اہلکار تاجدار اللہ کی اہلیہ حنا کو گرفتار کرلیا۔
پولیس کے مطابق تاجدار اللہ فائرنگ سے جاں بحق ہوا جب کہ ان کی اہلیہ نے اپنے ابتدائی بیان میں دعویٰ کیا تھا کہ اس کے شوہر نے خود کو گولی مار کر خودکشی کی ہے۔ جس فلیٹ میں یہ واقعہ پیش آیا وہاں سے 9 ایم ایم پستول کے تین خول ملے ہیں جبکہ مقتول کے سینے پر دو گولیوں کے نشانات بھی ہیں جس سے واقعہ کے بارے میں شبہات پیدا ہوئے ہیں۔
پولیس کے مطابق تفتیش کے دوران حنا سمیت یونس اور عدیل کے خلاف قتل کا مقدمہ درج کر لیا گیا ہے۔ حنا کو گرفتار کر لیا گیا ہے جبکہ یونس اور عدیل کی گرفتاری کے لیے چھاپے مارے جا رہے ہیں۔ پولیس قتل کی اصل وجہ اور واقعے کی حقیقت جاننے کے لیے مزید تفتیش میں مصروف ہے۔
