سہون (رپورٹ: علی بخش سولنگی) سہون شہر میں بنیادی سہولیات کا بحران سنگین ہوتا جا رہا ہے۔ شہریوں کا کہنا ہے کہ بجلی، گیس، پینے کے پانی اور سڑکوں کے مسائل کے بعد اب موبائل نیٹ ورک کی سہولت بھی بند کر دی گئی ہے۔
شہریوں کے مطابق 24 گھنٹے سے زائد کا عرصہ گزرنے کے باوجود سہون شہر میں موبائل نیٹ ورک بحال نہیں ہوسکا ہے جس کے باعث شہریوں کو مواصلات، آن لائن کاروبار اور روزمرہ کے امور میں شدید مشکلات کا سامنا ہے۔
شہریوں کا کہنا تھا کہ تاریخی اور سیاحتی شہر سہون کا بنیادی سہولیات سے محروم ہونا تشویشناک صورتحال ہے۔ انہوں نے مطالبہ کیا کہ متعلقہ حکام فوری نوٹس لے کر بجلی، گیس، پانی، سڑکوں اور موبائل نیٹ ورک کے مسائل حل کریں۔
