واشنگٹن (ویب ڈیسک) امریکی محکمہ خزانہ نے ایران سے متعلق نئی پابندیاں عائد کر دی ہیں۔ ان نئی پابندیوں میں چار ایرانی شہریوں اور چار کرپٹو کرنسی ایکسچینجز کو بلیک لسٹ کیا گیا ہے۔
امریکی حکام کے مطابق ان اداروں کے ساتھ مالی لین دین کرنے والے غیر ملکی بینک اور افراد بھی پابندیوں کی زد میں آ سکتے ہیں، جس سے عالمی مالیاتی نظام پر بھی اثر پڑنے کا امکان ہے۔
دوسری جانب ایرانی میڈیا رپورٹس کے مطابق تہران نے اب تک امریکا کے حتمی منصوبے کا باضابطہ جواب نہیں دیا، تاہم اندرونی سطح پر اس پر غور و خوض جاری ہے۔
مہر نیوز کے مطابق ایران امریکی تجویز کا جائزہ لے رہا ہے اور اس بات پر زور دے رہا ہے کہ ماضی کے تجربات کو مدنظر رکھتے ہوئے اسے صرف وہی معاہدہ قبول ہوگا جس سے حقیقی اور ٹھوس فوائد حاصل ہو سکیں۔