واشنگٹن: امریکی صدر ڈونلڈ ٹرمپ نے کہا ہے کہ انہوں نے ایران کو واضح پیغام دیا ہے کہ اب وقت آگیا ہے کہ دونوں ممالک کسی نہ کسی شکل میں ایک معاہدے تک پہنچ جائیں۔
اپنے تازہ بیان میں صدر ٹرمپ نے واضح کیا کہ ایران گزشتہ 47 برس سے جس طرزِ عمل پر عمل پیرا ہے، اسے مزید جاری رکھنے کی اجازت نہیں دی جا سکتی اور موجودہ حالات میں سفارتی حل ہی آگے بڑھنے کا بہترین راستہ ہے۔
ڈونلڈ ٹرمپ نے مذاکرات میں تعطل کی خبروں کو مسترد کرتے ہوئے کہا کہ دونوں ممالک کے درمیان رابطے مسلسل جاری ہیں۔
انہوں نے مزید کہا کہ گفتگو مختلف معاملات پر ہو رہی ہے، تاہم ابھی یہ کہنا قبل از وقت ہوگا کہ مذاکرات کا حتمی نتیجہ کیا نکلے گا۔
عالمی مبصرین کے مطابق ان سفارتی رابطوں کے مشرقِ وسطیٰ اور عالمی سیاست پر گہرے اثرات مرتب ہو سکتے ہیں۔