میرپورخاص: (رپورٹ: امجد خاصخیلی) سیٹلائٹ ٹاؤن تھانے کی حدود رنگ روڈ پر کراچی سے عمرکوٹ جانے والی مسافر کوچ اور ٹرک کے درمیان آمنے سامنے خوفناک ٹکر کے نتیجے میں کوچ کا ڈرائیور محبوب اریسر موقع پر ہی جاں بحق ہو گیا، جبکہ 14 مسافر زخمی ہو گئے۔
حادثے کے بعد پیچھے سے آنے والا ایک چنگچی رکشہ اور موٹر سائیکل سوار بھی ٹرک سے ٹکرا گئے، جس کے باعث علاقے میں افراتفری پھیل گئی۔
اطلاع ملنے پر پولیس اور ریسکیو ٹیمیں موقع پر پہنچ گئیں اور لاش اور زخمیوں کو سول ہسپتال میرپورخاص منتقل کیا۔
ڈاکٹر لیکھراج راٹھور کے مطابق: کچھ زخمیوں کی حالت تشویشناک ہے۔ پولیس نے حادثے کی وجوہات جاننے کے لیے تحقیقات شروع کر دی ہیں، جبکہ جاں بحق ڈرائیور کی لاش قانونی کارروائی کے بعد ورثاء کے حوالے کی جائے گی۔
