ٹنڈو محمد خان (ویب ڈیسک) ٹنڈو محمد خان میں سجاول روڈ پر دن دہاڑے ڈاکوؤں نے ڈکیتی کی واردات کے دوران مزاحمت کرنے پر ایک نوجوان کو گولی مار کر زخمی کر دیا۔
ورثا کے مطابق زخمی نوجوان کی شناخت جام سٹھیو کے نام سے ہوئی ہے، جسے ابتدائی طبی امداد دینے کے بعد تشویشناک حالت میں حیدرآباد منتقل کیا جا رہا ہے۔
ورثا کا کہنا ہے کہ ڈاکو نوجوان سے موبائل فون، موٹر سائیکل اور نقد رقم لوٹ کر فرار ہوگئے۔
واقعے کو کئی گھنٹے گزر جانے کے باوجود پولیس کی جانب سے کوئی مؤثر کارروائی سامنے نہیں آ سکی ہے۔
علاقہ مکینوں نے الزام عائد کیا ہے کہ پولیس جائے وقوعہ سے غائب تھی، جس کے باعث دن دہاڑے جرائم میں اضافہ ہو رہا ہے۔
شہریوں نے اعلیٰ حکام سے مطالبہ کیا ہے کہ ملزمان کو فوری گرفتار کر کے علاقے میں امن و امان کی صورتحال بہتر بنائی جائے۔
