کراچی (نامہ نگار) کاؤنٹر ٹیررازم ڈیپارٹمنٹ (سی ٹی ڈی) کراچی اور وفاقی انٹیلی جنس اداروں نے کالعدم تنظیموں بلوچستان لبریشن آرمی (بی ایل اے) اور تحریک طالبان پاکستان (ٹی ٹی پی) سے تعلق کے شبہ میں 3 افراد کو گرفتار کرنے کا دعویٰ کیا ہے۔
سی ٹی ڈی کے ترجمان کے مطابق لسبیلہ چوک بس اسٹاپ کے قریب کارروائی کے دوران ساجد یوسف اور شوکت علی عرف شوقی کو بی ایل اے سے تعلق کے الزام میں گرفتار کیا گیا، ان کے قبضے سے 2 دستی بم برآمد ہوئے۔ ایک اور کارروائی پرانی سبزی منڈی کے قریب کی گئی جہاں داد محمد عرف عادل کو ٹی ٹی پی سے تعلق کے شبے میں گرفتار کیا گیا اور اس کے قبضے سے دیسی ساختہ بم برآمد کیا گیا۔
ترجمان کے مطابق گرفتار ملزمان کراچی میں حساس مقامات اور قانون نافذ کرنے والے اداروں کو نشانہ بنانے کی منصوبہ بندی کر رہے تھے۔ ملزمان کے خلاف سی ٹی ڈی تھانے میں تین مقدمات درج کر کے مزید تفتیش شروع کر دی گئی ہے۔
