ٹنڈو الہ یار (نامہ نگار) اینٹی کرپشن اسٹیبلشمنٹ ضلع ٹنڈو الہ یار میں پینے کے پانی کی فراہمی اور سیوریج کو ٹھکانے لگانے کی سکیموں میں مبینہ بے ضابطگیوں، نامکمل منصوبوں اور غیر معیاری کام کی شکایات پر حرکت میں آ گئی جس نے محکمہ پبلک ہیلتھ انجینئرنگ کے متعلقہ افسران اور اہلکاروں سے ریکارڈ طلب کر لیا۔
اینٹی کرپشن نے آر او پلانٹس اور ترقیاتی منصوبوں کی تکمیل اور کارکردگی کی تفصیلات طلب کر لیں۔ اس سلسلے میں ٹینڈرز، منظوری، ٹھیکے، ادائیگیاں، فعال اور غیر فعال منصوبوں کی تفصیلات، ٹھیکیداروں کے نام اور خرچ کیے گئے فنڈز کا ریکارڈ جمع کرانے کی ہدایت کی گئی ہے۔
اسسٹنٹ ڈائریکٹر اینٹی کرپشن آصف علی راجپر نے محکمہ پبلک ہیلتھ انجینئرنگ کے ایگزیکٹو انجینئر کو نوٹس جاری کرتے ہوئے 12 اکتوبر کو دوپہر 12 بجے متعلقہ دستاویزات کے ساتھ پیش ہونے کی ہدایت کی ہے۔ شکایات کی تصدیق کے لیے ریکارڈ کی چھان بین کی جائے گی اور متعلقہ افسران کے بیانات بھی قلمبند کیے جائیں گے۔
