ڈھاکا: بنگلہ دیش کے دارالحکومت ڈھاکا میں ایک کیمیکل اور گارمنٹس فیکٹری میں لگنے والی خوفناک آگ سے کم از کم 16 افراد ہلاک ہوگئے۔
فائر سروس ڈپارٹمنٹ کے ڈائریکٹر تاج الاسلام چوہدری کے مطابق آگ سب سے پہلے فیکٹری کے گودام میں لگی، جو بعد میں قریب واقع کثیر المنزلہ گارمنٹس عمارت تک پھیل گئی۔ تمام لاشیں گارمنٹس فیکٹری سے برآمد ہوئیں۔
عینی شاہدین کے مطابق دھماکے کی آواز سنائی دی جس کے بعد پورا علاقہ آگ اور دھوئیں سے بھر گیا۔ ایک عینی شاہد طاہمنہ شارمین نے بتایا کہ "لوگ خوفزدہ ہو گئے، کچھ سمجھ نہیں آرہا تھا کہ کیا کریں۔”
متاثرین کے اہل خانہ فیکٹری کے باہر اپنے پیاروں کی تلاش میں پریشان دکھائی دیے۔ 19 سالہ عبدالرحمن نے بتایا کہ اس کا بھائی روبن فیکٹری میں کام کرتا تھا اور اس کے ایک ساتھی نے بتایا کہ روبن اندر ہی رہ گیا۔
ریسکیو حکام کے مطابق مرنے والوں کو زیادہ تر زہریلے کیمیکل کے دھوئیں سے سانس رکنے کی وجہ سے موت ہوئی۔ فائر فائٹرز نے کئی گھنٹوں کی جدوجہد کے بعد آگ پر قابو پایا تاہم کیمیکل ویئرہاؤس میں ابھی داخل نہیں ہوا گیا۔
واضح رہے کہ بنگلہ دیش میں گزشتہ سال 26 ہزار سے زائد آتشزدگی کے واقعات رپورٹ ہوئے، جن میں زیادہ تر حفاظتی اصولوں کی خلاف ورزی کے باعث پیش آئے۔
یاد رہے کہ 2012 میں ڈھاکا کے مضافات میں ایک گارمنٹس فیکٹری میں آگ لگنے سے 111 افراد ہلاک اور 200 سے زائد زخمی ہوئے تھے، جو ملک کی تاریخ کا بدترین فیکٹری حادثہ سمجھا جاتا ہے۔
