جیکب آباد (حکام علی) جیکب آباد میں تھانہ میران پور کی حدود بیگاری پل کے قریب 31 جولائی کو مبینہ پولیس مقابلے میں جاں بحق ہونے والے علی حیدر راحی بلیدی کے ورثاء نے پریس کلب کے سامنے احتجاجی مظاہرہ کیا۔
ورثاء نے الزام لگایا کہ علی حیدر کو جعلی پولیس مقابلے میں مارا گیا، جس پر فائٹر انچارج واحد چانڈیو سمیت 6 پولیس اہلکاروں کے خلاف مقدمہ درج کیا گیا، جب کہ ایک اہلکار نصیر کلہوڑو کو گرفتار کر لیا گیا، باقی ملزمان فرار ہیں۔
ورثاء کا کہنا ہے کہ انہیں مقدمہ سے دستبردار ہونے کی دھمکیاں دی جارہی ہیں۔ انہوں نے آئی جی سندھ، ڈی آئی جی لاڑکانہ اور ایس ایس پی جیکب آباد سے مطالبہ کیا کہ باقی ملزمان کو گرفتار کرکے انصاف فراہم کیا جائے۔
