نوشہرو فیروز (ویب ڈیسک) نوشہرو فیروز کے علاقے پڈعیدن کے قریب گاؤں حسین بخش جویو میں ڈائریا کی وبا تیزی سے پھیلنے لگی ہے، جس کے باعث والدین میں خوف اور تشویش کی صورتحال پیدا ہوگئی ہے۔
گاؤں میں ڈائریا میں مبتلا 7 سالہ بچہ تنویر ولد رفیق جویو جاں بحق ہوگیا۔ بچے کو پیٹ کی تکلیف، قے اور اسہال کے باعث پڈعیدن اسپتال منتقل کیا گیا تھا، تاہم ورثا کے مطابق سہولیات کی کمی کے سبب اس کی حالت مزید بگڑ گئی اور وہ دم توڑ گیا۔
دیہاتیوں کے مطابق علاقے میں 10 سے زائد بچے بھی اس بیماری میں مبتلا ہیں، جبکہ مناسب علاج کی سہولیات میسر نہیں۔ مکینوں نے محکمہ صحت سے مطالبہ کیا ہے کہ فوری طور پر میڈیکل ٹیمیں بھیج کر وبا پر قابو پایا جائے اور مزید معصوم جانوں کو بچایا جائے۔
