دادو (رپورٹر) پنجاب پولیس نے خواتین کی اسمگلنگ کے کیس میں اہم کارروائی کرتے ہوئے مبینہ سہولت کار سلیم ملاح کو گرفتار کر لیا۔
پولیس کے مطابق ملزم کو دادو سے حراست میں لے کر مزید تحقیقات کے لیے نامعلوم مقام پر منتقل کر دیا گیا ہے۔
دوسری جانب گرفتار سلیم ملاح کے والد اور زمیندار ایوب ملاح نے اپنے بیٹے کی گرفتاری کے خلاف ڈی ایس پی آفس کے سامنے دھرنا دیا۔ اس موقع پر صحافیوں سے گفتگو کرتے ہوئے انہوں نے کہا کہ ان کے بیٹے کا خواتین کی اسمگلنگ یا کسی بھی غیر قانونی سرگرمی سے کوئی تعلق نہیں ہے۔
ایوب ملاح نے الزام لگایا کہ ان کے بیٹے کو بلاجواز گرفتار کیا گیا ہے، اسے فوری رہا کیا جائے۔ مظاہرین نے حکام سے واقعے کی شفاف تحقیقات اور انصاف فراہم کرنے کا مطالبہ کیا ہے۔ پولیس کی جانب سے کیس کی مزید تفتیش جاری ہے۔