گھوٹکی (جعفر شیخ) گھوٹکی کے نواحی تھانہ کچو بانڈی کی حدود میں گاؤں ملوک شیخ میں مبینہ الزام پر دوہرے قتل کی واردات ہوئی ہے۔
پولیس کے مطابق ملزم کھنڈل شیخ نے مبینہ طور پر اپنی بیوی مائی ملوکاں شیخ اور نوجوان نور حسن شیخ کو فائرنگ کرکے قتل کردیا اور فرار ہوگیا۔
اطلاع ملنے پر پولیس نے موقع پر پہنچ کر دونوں جاں بحق ہونے والوں کی لاشوں کو اسپتال منتقل کیا جہاں سے ضروری قانونی کارروائی کے بعد لاشیں ورثاء کے حوالے کر دی گئیں۔
پولیس کا کہنا ہے کہ مبینہ ملزمان مکان خالی کر کے فرار ہو گئے ہیں، واقعے کی مختلف زاویوں سے تفتیش کی جا رہی ہے۔
ادھر مقتول نور حسن شیخ کی اہلیہ مائی پوپری نے الزام لگایا ہے کہ کھنڈل شیخ، امام بخش شیخ اور دیگر ملزمان نے مبینہ طور پر گنے کے کھیت میں اس کے شوہر کو بے گناہ گولیاں مار کر قتل کیا۔
مائی پوپری کہتی ہیں کہ پولیس بھی ان کی مدد نہیں کر رہی۔ انہوں نے اعلیٰ حکام سے واقعہ کا نوٹس لینے، ذمہ داروں کے خلاف کارروائی اور انصاف فراہم کرنے کا مطالبہ کیا ہے۔
