لاڑکانہ (ویب ڈیسک) لاڑکانہ میں گھنٹہ پھاٹک کے علاقے میں نامعلوم مسلح افراد نے صبح سویرے پولیس اہلکاروں پر اندھا دھند فائرنگ کر دی۔ گولیوں کی زد میں آنے کے نتیجے میں ون فائیو (15) بیس ٹو کے پولیس اہلکار مجیب الرحمن سولنگی موقع پر ہی شہید ہو گئے، جبکہ ان کے ساتھی اہلکار نعمت اللہ میمن شدید زخمی ہو گئے۔
واقعے کی اطلاع ملتے ہی پولیس کی بھاری نفری نے پہنچ کر علاقے کو گھیرے میں لے لیا۔
شہید اہلکار کی میت اور زخمی کو فوری طور پر لاڑکانہ کے ٹراما سینٹر منتقل کیا گیا، جہاں زخمی اہلکار کی حالت تشویشناک بتائی جا رہی ہے۔
واقعے کے بعد ہسپتال کے باہر پولیس اہلکاروں اور لواحقین کا شدید رش جمع ہو گیا ہے، جبکہ ملزمان کی گرفتاری کے لیے ناکہ بندی کر دی گئی ہے۔