کراچی (ویب ڈیسک) کراچی کے علاقے کورنگی نمبر 6 مارکیٹ کے قریب بہادر خواتین نے مزاحمت کر کے مسلح ڈاکوؤں کی لوٹ مار کی بڑی کوشش ناکام بنا دی، جس کے بعد ملزمان فائرنگ کرتے ہوئے فرار ہو گئے۔
عینی شاہدین کے مطابق 4 مسلح ڈاکو مارکیٹ میں واقع ایک کاسمیٹکس کی دکان میں داخل ہوئے، جہاں خواتین اور بچے موجود تھے۔ ڈاکوؤں کو دیکھ کر خواتین نے ڈرنے کے بجائے ان کا مقابلہ کیا، جس پر ڈاکو بغیر کسی لوٹ مار کے بوکھلا گئے اور خوف میں فائرنگ کرتے ہوئے بھاگ نکلے۔
خوش قسمتی سے واقعے میں کوئی جانی نقصان نہیں ہوا۔
واقعے کی اطلاع ملتے ہی عوامی کالونی تھانے کی پولیس فوری طور پر موقع پر پہنچی اور ملزمان کا پیچھا کیا۔
ایس ایچ او عوامی کالونی عدنان بخاری نے میڈیا کو بتایا کہ بہادر خواتین کی مزاحمت کے باعث ملزمان دکاندار اور خریداروں کو لوٹے بغیر ہی فرار ہونے پر مجبور ہوئے، جن کی گرفتاری کے لیے علاقے میں سرچ آپریشن شروع کر دیا گیا ہے۔