خیرپور (رپورٹر): خیرپور کے قریب ایک انتہائی افسوسناک اور انسانیت سوز واقعہ سامنے آیا ہے، جہاں ایک 8 سالہ معصوم بچی پر کارو کاری (کالی) کا الزام لگا کر اسے قتل کرنے کی کوشش کی گئی ہے۔ معصوم بچی تحفظ کے لیے پولیس کے پاس پہنچی لیکن پولیس نے مدد کرنے کے بجائے اسے واپس بھیج دیا، جس کے بعد بچی کی فریاد والی ویڈیو سوشل میڈیا پر وائرل ہو گئی ہے۔
تفصیلات کے مطابق، خیرپور کے قریب گاؤں مسیح منگریو کی رہائشی 8 سالہ بچی شہلا منگریو کی ایک ویڈیو سوشل میڈیا پر تیزی سے وائرل ہو رہی ہے، جس میں وہ روتے ہوئے اپنے ماموں پر سنگین الزام لگا رہی ہے۔ بچی شہلا نے اپنے بیان میں کہا کہ "میرے ماموں بالو منگریو نے مجھ پر کالی (کاری) کا الزام لگایا ہے، وہ مجھے قتل کر دیں گے، خدارا مجھے تحفظ دیا جائے۔”
معصوم بچی نے ویڈیو میں انکشاف کیا ہے کہ وہ اپنی جان بچانے کے لیے پہلے پولیس کے پاس مدد کے لیے گئی تھی، لیکن پولیس اہلکاروں نے اسے تحفظ دینے یا کارروائی کرنے کے بجائے تھانے سے واپس بھگا دیا، جس کی وجہ سے اس کی جان کو شدید خطرہ لاحق ہے۔
بچی کی ویڈیو سوشل میڈیا پر وائرل ہونے اور عوامی دباؤ بڑھنے کے بعد ایس ایس پی خیرپور نے واقعے کا سخت نوٹس لیا ہے۔ ایس ایس پی کا کہنا ہے کہ معصوم بچی کو ہر صورت میں مکمل تحفظ فراہم کیا جائے گا اور غفلت برتنے والوں کے خلاف کارروائی ہوگی۔ پولیس کی جانب سے واقعے کی باقاعدہ تحقیقات بھی شروع کر دی گئی ہیں۔
