گمبٹ (رپورٹر): گمبٹ میں جوگی برادری کی جانب سے نوجوان کے قاتلوں کی گرفتاری کے لیے پولیس کے خلاف پریس کلب کے سامنے احتجاجی مظاہرہ کیا گیا۔
پپری کے رہائشی غلام عباس جوگی، سلطان جوگی، شاہد فرید، غلام فرید، مائی پوپری اور فرزانہ پٹھانی نے پریس کلب گمبٹ کے سامنے احتجاج کرتے ہوئے الزام لگایا کہ ایک ہفتہ قبل ان کی برادری سے تعلق رکھنے والا نوجوان ندیم جوگی مبینہ طور پر لاپتہ ہو گیا تھا، جس کی لاش تین دن پہلے نولکھی کے قریب سے ملی تھی۔
احتجاج کرنے والوں نے میڈیا کو بتایا کہ واقعے کا مقدمہ ٹنڈو مستی تھانے میں درج ہے، لیکن پولیس ابھی تک ایک بھی ملزم کو گرفتار کرنے میں ناکام رہی ہے۔ پولیس کی اس نااہلی اور سستی کے باعث لواحقین میں سخت بے چینی اور غصہ پھیلا ہوا ہے۔
مظاہرین نے مطالبہ کیا کہ معاملے کی شفاف تحقیقات کرائی جائیں، ملوث ملزمان کو فوری طور پر گرفتار کر کے انہیں انصاف فراہم کیا جائے۔ انہوں نے ڈی آئی جی سکھر اور ایس ایس پی خیرپور سے پرزور اپیل کی کہ نوجوان کے قتل کے معاملے کا فوری نوٹس لے کر قاتلوں کو قانون کے کٹہرے میں لایا جائے۔
