گھوٹکی (نامہ نگار) ضلع گھوٹکی کے علاقے یارولڈ کے قریب سومر موری میں پرانی دشمنی پر فائرنگ سے استاد سمیت دو افراد جاں بحق ہو گئے جس سے علاقے میں خوف وہراس پھیل گیا۔
تفصیلات کے مطابق رات گئے مسلح افراد نے مبینہ طور پر استاد ثناء اللہ لاشاری کے گھر میں گھسنے کی کوشش کی، اس دوران فائرنگ کی گئی۔ گولیاں لگنے سے استاد ثناء اللہ لاشاری موقع پر ہی جاں بحق ہوگئے، ان کی لاش کو اسپتال منتقل کردیا گیا۔
دوسری جانب علی الصبح گاؤں والوں کو افضل لاشاری کی گولیوں سے چھلنی لاش بھی گاؤں کے قریب کی زمین سے ملی۔ اطلاع پر یارولڈ پولیس نے موقع پر پہنچ کر لاش کو تحویل میں لے کر ہسپتال منتقل کر دیا۔
مقتول استاد کے بھائی امان اللہ لاشاری نے بتایا کہ رات گئے چور گھر میں داخل ہوئے۔ اہل خانہ جاگنے پر ملزمان نے فائرنگ کردی جس کے نتیجے میں اس کا بھائی جاں بحق ہوگیا۔ انہوں نے الزام لگایا کہ افضل لاشاری کو بھی گائوں سے کچھ فاصلے پر ان کے اپنے دوستوں نے گولی مار کر ہلاک کیا۔
دریں اثناء یارلینڈ پولیس کے مطابق دونوں فریقین کے درمیان پرانا جھگڑا تھا جو پہلے ہی طے پا چکا تھا۔ پولیس کا کہنا ہے کہ دونوں قتل کی اصل وجہ جاننے کے لیے تفتیش جاری ہے۔
پولیس نے دونوں مقتولین کی لاشیں ضروری قانونی کارروائی اور پوسٹ مارٹم کے لیے سول اسپتال میرپور ماتھیلو منتقل کر دی ہیں جب کہ واقعے کی مزید تفتیش جاری ہے۔
