[ad_1]
اسلام آباد:
امیگریشن آسانی اور انسانی اسمگلنگ کے خاتمے کے لیے ایف آئی اے کی اے آئی بیسڈ ایپ تیار کرلی گئی ہے۔ اس حوالے سے پائلٹ پراجیکٹ کا آغاز اسلام آباد ائرپورٹ سے ہو گا ۔
وفاقی وزیر داخلہ محسن نقوی نے ایف آئی اے ہیڈکوارٹر اسلام آباد کا دورہ کیا، جہاں انہوں نے اعلیٰ سطح اجلاس کی صدارت کی اور ایف آئی اے کو جدید خطوط پر استوار کرنے کے سلسلے میں گزشتہ اجلاس میں لیے گئے فیصلوں پر پیش رفت کا جائزہ لیا گیا۔
اس موقع پر امیگریشن کو سہل بنانے اور انسانی اسمگلنگ کے انسداد کی اے آئی بیسڈ ایپ کے بارے میں وزیر داخلہ کو بریفنگ دی گئی ۔ محسن نقوی نے اے آئی بیسڈ ایپ کو سراہا اور وقت کی اہم ضرورت قرار دیا ۔
محسن نقوی نے کہا کہ اس اقدام سے انسانی اسمگلنگ کی روک تھام کے ساتھ مسافروں کو قطاروں سے نجات ملے گی۔ آئی ٹی انفرا اسٹرکچر بہتر بنانے کے لیے مطلوبہ فنڈ فوری فراہم کیے جائیں گے۔ انہوں نے ہیڈ کوارٹر بلڈنگ کی فوری طور پر اپ گریڈیشن کی ہدایات بھی جاری کیں۔
وزیر داخلہ نے سی ڈی اے کو ایف آئی اے اکیڈمی کی نئی الاٹ کردہ اراضی ادارے کے حوالے کرنے کی ہدایت کے ساتھ ساتھ اسٹاف کی کمی کے پیش نظر منظور شدہ خالی اسامیوں پر فی الفور بھرتی کا عمل شروع کرنے کی ہدایات بھی جاری کیں۔
انہوں نے کہا کہ تمام ضروری وسائل کی فراہمی یقینی بنائی جائے گی، تاہم اس کے ساتھ آپ کو کارکردگی بھی دکھانا ہو گی۔
اس موقع پر ڈائریکٹر جنرل ایف آئی اے راجا رفعت مختار نے وفاقی وزیر داخلہ محسن نقوی کو بریفنگ دی، جس میں بتایا گیا کہ ایف آئی ایکٹ میں ضروری ترامیم پر کام مکمل کیا جا چکا ہے۔ ادارے کی ڈیجیٹلائزیشن کا عمل ترجیحی بنیادوں پر جاری ہے۔ ادارے کو کو قلیل مدت میں ای آفس پر منتقل کر دیا گیا ہے۔ ایف آئی اے کے تمام نوٹس بھی کیو آر کوڈ کے ساتھ جاری کیے جائیں گے۔
ایف آئی اے کے تمام ایڈیشنل ڈائریکٹر جنرلز اور ڈائریکٹرز نے اس اہم اجلاس میں شرکت کی جب کہ تمام زونل ڈائریکٹرز بھی اجلاس میں آن لائن شریک تھے۔
[ad_2]
Source link
