نوشہروفیروز (رپورٹر): پیپلز پارٹی کی قیادت کی جانب سے نظرانداز کیے جانے پر دلبرداشتہ ہو کر خود کو آگ لگانے والا پی پی کا سینئر اور پرانا جیالا حاجی خان شیخ زخموں کی تاب نہ لاتے ہوئے کراچی کے سول ہسپتال میں انتقال کر گیا ہے۔
تفصیلات کے مطابق، بھریا روڈ کے رہائشی معمر جیالے حاجی خان شیخ نے پانچ روز قبل پارٹی میں نظرانداز کیے جانے پر شدید مایوسی کی حالت میں اپنے اوپر پٹرول چھڑک کر خودکشی کی کوشش کی تھی۔
آگ لگنے کے نتیجے میں ان کا 80 فیصد جسم بری طرح جھلس گیا تھا، جس کے بعد انہیں تشویشناک حالت میں پہلے نوابشاہ اور بعد میں کراچی کے سول ہسپتال کے برنز وارڈ منتقل کیا گیا تھا۔ پانچ روز تک زندگی اور موت کی کشمکش میں رہنے کے بعد معمر جیالا آج صبح دم توڑ گیا۔ سینئر جیالے کے انتقال کی خبر کے بعد بھریا روڈ میں پی پی کے مقامی کارکنوں اور شہریوں میں شدید غم و غصے اور سوگ کی لہر دوڑ گئی ہے۔