کراچی (ویب ڈیسک) آخری نبی حضرت محمد مصطفیٰ ﷺ کا یوم ولادت ملک بھر میں مذہبی عقیدت و احترام سے منایا جا رہا ہے۔ دن کا آغاز توپوں کی سلامی سے ہوا جب کہ مساجد، عمارتوں، گلیوں اور چوکوں کو خوبصورتی سے سجایا گیا ہے۔
کراچی، لاہور، پشاور، کوئٹہ اور اسلام آباد سمیت سندھ کے چھوٹے بڑے شہروں میں محفل میلاد، نعت خوانی اور ریلیوں کا سلسلہ جاری ہے۔
کراچی میں مختلف مقامات پر الیکٹرک لائٹس لگائی گئی ہیں اور عمارتوں کو سجا دیا گیا ہے۔
کراچی کا مرکزی جلوس آج دوپہر ڈھائی بجے شہید مسجد کرادار سے نکلے گا اور نیو میمن مسجد سے ہوتا ہوا گلزار حبیب مسجد پہنچے گا۔
لاہور میں مرکزی جلوس ریلوے اسٹیشن چوک سے روانہ ہوگا، کوئٹہ میں مرکزی جلوس باچا خان چوک پر ہوگا۔
ملک کی ترقی، خوشحالی اور سلامتی کے لیے خصوصی دعائیں بھی کی جا رہی ہیں۔
عید میلاد النبی (ص) کے موقع پر کے الیکٹرک نے اعلان کیا ہے کہ آج کراچی میں لوڈ شیڈنگ نہیں ہوگی۔
