اسلام آباد (ویب ڈیسک) اسلام آباد کے پمز ہسپتال کی نرسری میں صبح 6 بج کر 45 منٹ پر آگ لگنے سے 15 بچے جاں بحق ہو گئے۔ ریسکیو ذرائع کے مطابق آگ ایئر کنڈیشنگ کمپریسر پھٹنے سے لگی۔
اسپتال انتظامیہ کے مطابق آگ لگنے کے وقت نرسری میں 16 بچے موجود تھے جن میں سے ایک کو بچا لیا گیا۔ ضلعی انتظامیہ کے مطابق حادثے میں 14 بچے مکمل طور پر جھلس گئے۔ امدادی کارروائیوں میں فائر بریگیڈ کی 6 گاڑیاں اور 4 ایمبولینسیں شامل تھیں۔
آگ پر قابو پانے کے بعد نرسری میں کولنگ کا عمل شروع کردیا گیا جب کہ واقعے کی تحقیقات کے لیے ایڈیشنل ڈپٹی کمشنر کی سربراہی میں کمیٹی تشکیل دے دی گئی ہے۔
وزیراعظم شہباز شریف نے پمز ہسپتال کی نرسری میں آتشزدگی سے بچوں کے جاں بحق ہونے پر دکھ اور افسوس کا اظہار کیا ہے۔
وزیراعظم نے واقعے کا نوٹس لیتے ہوئے حکام کو فوری تحقیقات کی ہدایت کی ہے۔ انہوں نے کہا کہ واقعے کی وجوہات کی تفصیلی تحقیقات کرائی جائے، ذمہ داروں کی نشاندہی کی جائے، ذمہ داروں کے خلاف سخت کارروائی کی جائے۔
