بالی ووڈ کی حالیہ کامیاب فلم ’’سیارا‘‘ کے ہدایت کار موہت سوری نے دلچسپ انکشاف کرتے ہوئے بتایا کہ اہان پانڈے ٹک ٹاک پر پہلے ’’گھٹیا اور کراہت آمیز‘‘ ویڈیوز بنایا کرتے تھے جنہیں بعد میں انہوں نے ڈیلیٹ کردیا۔

فلم ’’سیارا‘‘ کے مرکزی اداکار اہان پانڈے ان دنوں فلمی حلقوں میں چرچے کا موضوع بنے ہوئے ہیں۔ 18 جولائی کو ریلیز ہونے والی اس فلم نے نہ صرف باکس آفس پر زبردست کامیابی حاصل کی بلکہ اہان کو بھی راتوں رات سپر اسٹار بنا دیا۔

فلم کی ریلیز سے پہلے یش راج فلمز نے اہان کو پروموشنل سرگرمیوں سے دور رکھنے کی حکمت عملی اپنائی تھی۔ ہدایت کار موہت سوری نے ایک انٹرویو میں بتایا کہ ’’اہان کی وہ پرانی ویڈیوز دیکھ کر آپ حیران رہ جائیں گے۔ وہ ایک مکمل ’چپڑی ٹک ٹاکر‘ تھا، بالکل لفنگا ٹائپ کا لڑکا۔ لیکن فلم سیارا میں اس کا یہ روپ بالکل نظر نہیں آتا، کیونکہ اس کی ضرورت ہی نہیں تھی۔‘‘

ہدایت کار نے فلم کی مرکزی اداکارہ انیت پڈا کے بارے میں بھی بات کرتے ہوئے کہا کہ اس میں مزاح کی غیر معمولی صلاحیت موجود ہے۔ انہوں نے ایک واقعہ بتاتے ہوئے کہا ’’کچھ دن پہلے انیت نے ویڈیو کال پر اپنی ماں کی نقل اتاری جو اسے ماسک نہ پہننے پر ڈانٹ رہی تھیں۔ میں ہنس ہنس کر لوٹ پوٹ ہو گیا۔‘‘

موہت سوری نے اہان اور انیت دونوں اداکاروں کی تعریف کرتے ہوئے کہا کہ یہ ان تمام نئے اداکاروں سے کہیں بہتر ہیں جن کے ساتھ وہ ماضی میں کام کر چکے ہیں۔ قابل ذکر بات یہ ہے کہ موہت سوری نے عمران ہاشمی، آدتیہ رائے کپور اور شردھا کپور جیسے نامور اداکاروں کے ساتھ بھی کامیاب فلمیں بنائی ہیں۔