مٹھی (رپورٹر): تھر کے تعلقہ ڈاہلی کے گاؤں بنگل رند میں بے زبان اونٹنی پر وحشیانہ تشدد کر کے اس کی آنکھیں نکالنے کے افسوسناک واقعے میں اہم پیش رفت ہوئی ہے۔ پولیس نے کارروائی کرتے ہوئے کھینسر تھانے میں 6 ملزمان کے خلاف مقدمہ درج کر کے 2 کو گرفتار کر لیا ہے۔ مقدمہ اونٹنی کے مالک لیلیو میگھواڑ کی مدعیت میں حمزہ خان، مختار، روشن، ممتاز، اختر اور حنیف کے خلاف درج کیا گیا ہے۔
دوسری جانب لائیو اسٹاک محکمے کی ٹیم نے گاؤں پہنچ کر زخمی اونٹنی کا طبی معائنہ کیا۔ ڈاکٹر اجے کمار کے مطابق اونٹنی کی آنکھیں لوہے کے اوزاروں سے بے رحمی کے ساتھ نکالی گئی ہیں، جس کے باعث اب اس کی بینائی کی بحالی ناممکن ہو چکی ہے۔ اس وحشیانہ واقعے کے بعد علاقے میں شدید غم و غصے کی لہر دوڑ گئی ہے اور عوام کی جانب سے ملزمان کو سخت سے سخت سزا دینے کا مطالبہ کیا جا رہا ہے۔
