قومی کرکٹ ٹیم کے کپتان سلمان علی آغا نے کہا ہے کہ ایشیا کپ کے لیے بھرپور تیاری کی گئی ہے، ٹیم مکمل طور پر تیار اور پُرجوش ہے اور آئندہ بھی ایک یونٹ کی طرح پرفارم کرے گی۔ ایشیا کپ کے پری ایونٹ میڈیا ٹاک میں ان کا کہنا تھا کہ یو اے ای میں کافی کرکٹ کھیل چکے ہیں، اگرچہ زیادہ میچ کھیلنے کا کوئی خاص ایڈوانٹیج نہیں مگر کنڈیشنز سے اچھی طرح واقف ہیں۔ انہوں نے کہا کہ ٹی ٹوئنٹی فارمیٹ میں کوئی بھی ٹیم فیورٹ نہیں ہوتی، صرف ایک یا دو اوورز میچ کا نقشہ بدل سکتے ہیں۔ سہ ملکی سیریز نے ٹیم کو خاصا فائدہ دیا اور گزشتہ پانچ ماہ سے ٹیم اچھی کرکٹ کھیل رہی ہے۔
