ڈہرکی (رپورٹ: علی رضا راجپوت) ڈہرکی کے قریب گاؤں غازی دڑو میں قائم ڈسکون کیمپ سے بجلی کی تاریں چوری کرنے کی کوشش ناکام بنا دی گئی ہے۔ گاؤں والوں نے مبینہ طور پر ڈہرکی تھانے کے ایک پولیس اہلکار کو بجلی کی تاریں چوری کرتے ہوئے رنگے ہاتھوں پکڑ لیا۔
گاؤں والوں کے مطابق پکڑے گئے ملزم نے خود کو پولیس اہلکار بتایا اور ڈیوٹی پر ہونے کا جواز پیش کیا، تاہم اس دوران اطلاع ملنے پر پہنچنے والی پولیس مبینہ طور پر اپنے پکڑے گئے ساتھی اہلکار کو چھڑا کر لے گئی۔ دوسری جانب واقعے کی ویڈیو سوشل میڈیا پر تیزی سے وائرل ہو رہی ہے، جس کے بعد ڈہرکی پولیس پر عوام کی جانب سے سخت تنقید کا سلسلہ جاری ہے۔ ذرائع کے مطابق چوری کے الزام میں آنے والے اہلکار کا نام ابھی تک راز میں رکھا گیا ہے اور پولیس کی جانب سے کوئی بھی سرکاری وضاحت سامنے نہیں آئی ہے۔
