گمبٹ (رپورٹر): میرواہ تھانے کی حدود میں بے زبان جانور پر تشدد کرنے والے ملزم صابر علی دستی کو پولیس نے گرفتار کر کے اس کے خلاف کیس درج کر لیا ہے۔
پولیس کے مطابق ملزم کی جانب سے گدھے پر تشدد کرنے کی ویڈیو سوشل میڈیا پر وائرل ہوئی تھی، جس کے بعد ایس ایس پی خیرپور نے معاملے کا نوٹس لیتے ہوئے فوری کارروائی کا حکم جاری کیا۔
احکامات کی روشنی میں میرواہ پولیس نے کارروائی کرتے ہوئے ملزم صابر علی دستی کو گرفتار کر لیا اور اس پر متعلقہ قوانین کے تحت کیس درج کر لیا گیا ہے۔
پولیس کا کہنا ہے کہ جانوروں کے ساتھ بے رحمانہ سلوک کسی بھی صورت میں برداشت نہیں کیا جائے گا اور ایسے واقعات میں ملوث افراد کے خلاف قانون کے مطابق سخت کارروائی کی جائے گی۔