بخشاپور (رپورٹر): بخشاپور تھانے کی حدود میں نامعلوم مسلح ملزمان نے ایک گھر پر دھاوا بول کر نوجوان صدر الدین چاچڑ کو بے دردی سے قتل کر دیا۔
پولیس کے مطابق ملزمان رات کے وقت گھر میں داخل ہوئے اور گھر کے اندر سوئے ہوئے نوجوان پر کلہاڑیوں کے وار کر کے اسے قتل کرنے کے بعد فرار ہو گئے۔
واقعے کی اطلاع ملتے ہی پولیس نے موقع پر پہنچ کر لاش کو تحویل میں لے کر ہسپتال منتقل کیا، جہاں ضروری قانونی کارروائی اور پوسٹ مارٹم کے بعد لاش وارثوں کے حوالے کر دی گئی۔ لاش گھر پہنچنے پر کہرام مچ گیا، جبکہ علاقے میں بھی سوگ کی لہر دوڑ گئی۔
