کراچی: محکمہ موسمیات کے مطابق کراچی میں بارشوں کا موسم شروع ہوچکا ہے، تاہم آئندہ ہفتے تک کسی مضبوط برسات کے سسٹم کے شہر پر اثر انداز ہونے کا امکان نہیں۔
محکمہ موسمیات کے ترجمان انجم نذیر ضیغم نے بتایا کہ آئندہ تین روز کے دوران کراچی میں موسم جزوی طور پر ابر آلود رہے گا، جبکہ بعض علاقوں میں ہلکی بارش یا بوندا باندی ہوسکتی ہے۔
ترجمان کے مطابق شہر کا زیادہ سے زیادہ درجہ حرارت 35 ڈگری سینٹی گریڈ کے قریب رہنے کا امکان ہے، جبکہ بحیرہ عرب اور صومالی ہواؤں کے باعث 30 سے 35 کلومیٹر فی گھنٹہ کی رفتار سے ہوائیں چلیں گی، جن کے جھکڑ 45 کلومیٹر فی گھنٹہ تک پہنچ سکتے ہیں۔
محکمہ موسمیات کا کہنا ہے کہ موجودہ صورتحال میں کراچی میں تیز بارشوں یا شہری سیلاب کا کوئی فوری خطرہ نہیں، تاہم شہری موسم کی تازہ صورتحال سے باخبر رہیں۔
محکمہ موسمیات کے مطابق ابتدائی جائزے کے تحت رواں سال کراچی میں بارشیں معمول سے کم رہنے کا امکان ہے، تاہم نئے موسمی نظام کی تشکیل سے صورتحال تبدیل ہوسکتی ہے۔
