جیکب آباد (رپورٹر) سٹی تھانے کی حدود میں جیکب آباد کے ایک نجی میڈیکل سینٹر میں زچگی کے دوران 22 سالہ خاتون رابعہ جکھرانی جاں بحق ہوگئی، جس کے بعد ورثا نے لیڈی ڈاکٹر پر غفلت کا الزام عائد کرتے ہوئے میڈیکل سینٹر کے باہر احتجاج کیا۔
ورثا میں شامل خدادوست جکھرانی کے مطابق پہلے نارمل ڈلیوری کرائی گئی تھی، تاہم بعد میں طبیعت بگڑنے پر خاتون کو دوبارہ اسپتال لایا گیا۔
ان کا کہنا ہے کہ لیڈی ڈاکٹر نے بتایا کہ پیٹ میں ایک بچہ رہ گیا ہے، جس کے لیے آپریشن کرنا ضروری ہوگا۔
ورثا کے مطابق آپریشن میں تاخیر کی گئی اور بعد ازاں ڈاکٹر وہاں سے چلی گئی، جس کے بعد خاتون کی حالت مزید خراب ہوگئی اور وہ دم توڑ گئی۔
واقعے کے بعد علاقہ مکینوں نے شدید احتجاج کرتے ہوئے ذمہ داروں کے خلاف کارروائی کا مطالبہ کیا ہے۔
