اسلام آباد: (ویب ڈیسک) بھارت کی جانب سے سلال ڈیم کے تمام آہنی گیٹ کھول دیے گئے، جس کے باعث دریائے چناب میں پانی کے بہاؤ میں نمایاں اضافہ ہوگیا ہے۔
پانی کے بہاؤ میں اضافے کے باعث پاکستان کے مختلف علاقوں میں سیلابی صورتحال پیدا ہونے کا خدشہ ظاہر کیا جا رہا ہے۔
محکمہ آبپاشی پنجاب کے مطابق سلال ڈیم کے دروازے کھلنے کے بعد ہیڈ خانکی، قادر آباد اور لہڑی ہیڈ گوگی پر اونچے درجے کا سیلاب ریکارڈ کیا جا رہا ہے۔
لاہور کے قریب ہیڈ مرالہ اور بلوکی پر درمیانے درجے کی سیلابی صورتحال ہے، جبکہ نارووال کے نالہ بسنتر میں بھی درمیانے درجے کا سیلاب موجود ہے۔
دوسری جانب تربیلا، چشمہ، منگلا، نوشہرہ، چنیوٹ برج اور نالہ ڈیک میں نچلے درجے کا سیلاب رپورٹ ہوا ہے۔
اعداد و شمار کے مطابق تربیلا ڈیم میں پانی کی سطح 1519.11 فٹ جبکہ منگلا ڈیم میں پانی کی سطح 1183.90 فٹ ریکارڈ کی گئی ہے۔
متعلقہ اداروں نے ممکنہ صورتحال سے نمٹنے کے لیے ہنگامی اقدامات اور تیاریاں شروع کردی ہیں۔
