کراچی: (ویب ڈیسک) شہر کے مختلف علاقوں میں گیس کی تیز بو پھیلنے سے شہریوں میں تشویش پھیل گئی ہے جب کہ متعدد افراد کو سانس لینے میں دشواری کی شکایت بھی ہوئی ہے۔
اطلاعات کے مطابق محمود آباد، منظور کالونی، کارساز اور اسٹیڈیم روڈ اور قریبی علاقوں میں گیس کی بو شدت سے محسوس کی گئی۔
دریں اثنا، سوئی سدرن گیس کمپنی کے ترجمان نے وضاحت کی کہ ابوالحسن اصفہانی روڈ کے قریب نئی گیس پائپ لائن کو چالو کرنے کے لیے کام جاری ہے، اس دوران پلانٹس کی ٹیسٹنگ کی جا رہی ہے۔
ترجمان کے مطابق ٹیسٹنگ کے دوران گیس میں عارضی طور پر بدبو پیدا کرنے والا مادہ زیادہ مقدار میں ملایا گیا جس کی وجہ سے بعض علاقوں میں بدبو معمول سے زیادہ محسوس کی گئی۔
انہوں نے کہا کہ مختلف علاقوں سے گیس کے اخراج کی شکایات موصول ہوئی ہیں تاہم تحقیقات کے دوران سسٹم کا پریشر نارمل ہے اور کہیں سے بھی گیس کے اخراج کی تصدیق نہیں ہوئی۔
سوئی سدرن گیس کمپنی نے شہریوں سے اپیل کی ہے کہ وہ پریشان نہ ہوں اور اپنے روزمرہ کے معمولات جاری رکھیں کیونکہ گیس کی بدبو کی شدت عارضی ہے اور ٹیسٹنگ مکمل ہونے کے بعد صورتحال معمول پر آجائے گی۔
