گمبٹ (رپورٹر): سیٹھارجہ سے چار ماہ قبل مبینہ طور پر اغوا ہونے والی دسویں جماعت کی طالبہ آصفہ مغل کی بازیابی کے لیے ان کے ورثا کی جانب سے سیٹھارجہ سے خیرپور ایس ایس پی آفس تک شروع کیا گیا پیدل مارچ گمبٹ پہنچ گیا ہے۔
پیدل مارچ میں شامل مغوی لڑکی کے والد، بھائی اور بہن نے میڈیا سے گفتگو کرتے ہوئے کہا کہ چار ماہ گزر چکے ہیں لیکن پولیس اب تک ان کی بیٹی کو بازیاب نہیں کرا سکی۔ انہوں نے کہا کہ آصفہ مغل صبح اسکول کے لیے نکلی تھی تو اسے اغوا کر لیا گیا، جس کی ایف آئی آر متعلقہ تھانے میں درج ہونے کے باوجود پولیس کوئی تعاون نہیں کر رہی۔
ورثا نے انتباہ دیتے ہوئے کہا کہ وہ پیدل مارچ کر کے ایس ایس پی خیرپور کے دفتر کے سامنے دھرنا دے کر بیٹھیں گے اور جب تک لڑکی کو بازیاب نہیں کرایا جائے گا، احتجاج جاری رہے گا۔ انہوں نے صوبائی وزیر داخلہ اور آئی جی سندھ سے اپیل کی کہ معاملے کا فوری نوٹس لے کر لڑکی کو بازیاب کرایا جائے تاکہ ان کے خاندان کی بے چینی ختم ہو سکے۔
