اسلام آباد/برکن اسٹاک (ویب ڈیسک): وزیر اعظم محمد شہباز شریف ایک اعلیٰ سطحی وفد کے ہمراہ اسلام آباد سے سوئٹزرلینڈ کے لیے روانہ ہو چکے ہیں، جہاں وہ اور چیف آف آرمی اسٹاف فیلڈ مارشل سید عاصم منیر امریکہ اور ایران کے درمیان ہونے والے تکنیکی سطح کے تاریخی مذاکرات میں شرکت کریں گے۔
یہ مذاکرات "اسلام آباد مفاہمتی یادداشت” کے تحت سوئٹزرلینڈ کے شہر برکن اسٹاک میں ہو رہے ہیں جس میں پاکستان بنیادی ثالث کا کردار ادا کر رہا ہے۔ یہ مذاکرات پہلے گزشتہ جمعہ کو ہونے تھے، تاہم لبنان کی کشیدہ صورتحال کے باعث انہیں ملتوی کر کے اب دوبارہ شروع کیا جا رہا ہے۔
مذاکرات میں امریکی وفد کی قیادت نائب صدر جے ڈی وینس، اسٹیو وٹکوف اور جیرڈ کشنر کر رہے ہیں، جبکہ ایران کی جانب سے اسپیکر محمد باقر قاليباف اور وزیر خارجہ عباس عراقچی شریک ہیں۔ اس اجلاس کا بنیادی ایجنڈا دونوں ممالک کے درمیان کشیدگی ختم کرنا، ایران پر سے اقتصادی پابندیاں ہٹانا، منجمد اثاثوں کی بحالی، اور آبنائے ہرمز سمیت خطے میں مستقل امن قائم کرنا ہے۔
