گمبٹ (رپورٹر): گمبٹ کے قریب گاؤں خانن ناریجو کے رہائشی 9 ماہ کے معصوم بچے محمد طاہر کا ایچ آئی وی کے باعث انتقال ہو گیا۔
بچے کی میت گھر پہنچنے پر کہرام مچ گیا جبکہ علاقے میں بھی غم کی لہر دوڑ گئی۔
ورثا کے مطابق محمد طاہر کی طبیعت خراب ہونے پر اسے گمس اسپتال گمبٹ میں داخل کرایا گیا، جہاں ٹیسٹوں کے دوران اس میں ایچ آئی وی کی تصدیق ہوئی۔ بعد ازاں مزید علاج کے لیے اسے لاڑکانہ منتقل کیا گیا، جہاں وہ دورانِ علاج انتقال کر گیا۔
دوسری جانب گمبٹ اور گرد و نواح میں ایچ آئی وی کے باعث اموات میں اضافے سے شہریوں میں خوف و ہراس پھیل گیا ہے۔
علاقہ مکینوں نے محکمہ صحت سے مطالبہ کیا ہے کہ وبا پر قابو پانے کے لیے مؤثر اقدامات کیے جائیں اور متاثرہ خاندانوں کو بہتر طبی سہولیات فراہم کی جائیں۔
